کوئٹہ میں ہلاکتوں کے خلاف ہڑتال
اس واقعے کے بعد مظاہرین نے گاڑیوں کو آگ لگائی اور سڑکوں پر ٹائر جلا کر سڑکیں بلاک کردیں
پاکستان کے صوبۂ بلوچستان کے دارالحکومت کوئٹہ میں گیارہ افراد کی ہلاکت کے خلاف اتوار کو ہڑتال کی جا رہی ہے۔
شیعہ مسلک سے تعلق رکھنے والے ان افراد کو سنیچر کو نامعلوم مسلح افراد نے ایک وین پر فائرنگ کر کے ہلاک کر دیا تھا۔
اس واقعے کے خلاف ہزارہ ڈیموکریٹک پارٹی نے اتوار کو شٹر ڈاؤن ہڑتال کا اعلان کیا تھا۔
کوئٹہ سے نامہ نگار ایوب ترین کے مطابق سنیچر کی صبح کوئٹہ کے علاقے اسپینی روڈ پر دو موٹر سائیکلوں پر سوار چار نامعلوم افراد نے ایک سوزوکی وین پر اندھا دھند فائرنگ کی تھی جس کے نتیجےمیں گیارہ افراد ہلاک اور تین زخمی ہو گئے تھے۔
پولیس کے مطابق ہلاک اور زخمی ہونے والے تمام افراد کا تعلق شیعہ مسلک سے ہے جو ہزارہ ٹاؤن سے ایک وین میں مری آباد جا رہے تھے۔
پولیس کے مطابق یہ مذہبی دہشت گردی اور نشانہ وار قتل کا واقعہ تھا اور لاشوں اور زخمیوں کو فوری طور پر بولان میڈیکل ہسپتال منتقل کر دیا گیا تھا۔
بلوچستان کے مختلف علاقوں خصوصاً کوئٹہ میں شیعہ مسلک سے تعلق رکھنے والے افراد کو ہدف بنا کر قتل کرنے کی وارداتوں میں تیزی سے اضافہ ہوا ہے اور جمعہ کو بھی سریاب روڈ پر نامعلوم افراد نے ایران جانے والے سات زائرین کو فائرنگ کر کے ہلاک کر دیا تھا جس کی ذمہ داری کالعدم نتظیم لشکرِ جھنگوی کے ترجمان شیر علی حیدری نے قبول کر لی تھی۔
سنیچر کو مزید گیارہ افراد کی ہلاکت کے بعد شیعہ مسلک اور ہزارہ برادری سے تعلق رکھنے والے افراد کی ایک بڑی تعداد بولان میڈیکل ہسپتال پہنچ گئی جہاں بعض مشتعل افراد نے ہسپتال کے احاطے میں کھڑی دو گاڑیوں کو نذرِ آتش کر دیا۔
اس کے علاوہ انہوں نے بروری روڈ پر ٹائر جلائے اور پتھراؤ بھی کیا جبکہ ہزارہ ٹاؤن کے علاقے میں ہوائی فائرنگ کا سلسلہ بھی جاری رہا۔
No comments:
Post a Comment